ការបិទបញ្ចប់កម្មវិធីសាកល្បងបណ្តុះធុរកិច្ច៖ អ្នកចូលរួមពីររូបដំបូងរបស់យើងទទួលបានប័ណ្ណសហគ្រិន

កម្មវិធីបណ្ដុះបណ្ដាលផ្នែកសហគ្រិនភាពប្រកបដោយចីរភាពរបស់សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច​(ស.ភ.ន.វ.ស) ត្រូវបានបិទបញ្ចប់ដោយស្ថាពរ។ សម្រាប់វគ្គដំបូងនេះ ដែលបានដំណើរការចាប់ពីខែឧសភា ដល់ខែកញ្ញា ឆ្នាំ២០២៦ សហគ្រិនចំនួនពីររូបបានមកទទួលប័ណ្ណសហគ្រិនរបស់ខ្លួន ក្នុងនោះរួមមាន៖ លោក ងុត វុទ្ធី ស្ថាបនិកក្រុមហ៊ុនធីតារ័ត្ន និងលោក កុក ថា មកពីក្រុមហ៊ុន FHF Capital PLC។

ប៉ូលសហគ្រិនភាពរបស់ ស.ភ.ន.វ.ស ត្រូវបានបង្កើតឡើងជាកន្លែងគាំទ្រ និងអនុវត្តជាក់ស្ដែង ដើម្បីជួយនិស្សិត និងអតីតនិស្សិតក្នុងការជំរុញគម្រោងសហគ្រិនភាពរបស់ពួកគេ ចាប់ពីដំណាក់កាលគំនិតផ្តួចផ្តើម រហូតដល់ដំណាក់កាលអភិវឌ្ឍ។ តាមរយៈការតម្រង់ទិសផ្ទាល់ខ្លួន សិក្ខាសាលាជាក់ស្ដែង និងការគាំទ្រពីអ្នកជំនាញប្រឹក្សា កម្មវិធីនេះអនុញ្ញាតឱ្យសិក្ខាកាមយកគម្រោងរបស់ខ្លួនទៅសាកល្បងលើទីផ្សារផ្ទាល់ ផ្ទៀងផ្ទាត់ការសន្និដ្ឋាន រៀបចំរចនាសម្ព័ន្ធគំរូអាជីវកម្ម និងបញ្ចូលបញ្ហាប្រឈមនៃចីរភាព។ គោលបំណងចម្បង គឺផ្តល់ឧបករណ៍ និងធនធានចាំបាច់ដល់សហគ្រិនម្នាក់ៗ ដើម្បីឱ្យសហគ្រិនគ្រប់រូបអាចអភិវឌ្ឍគម្រោងទៅតាមសមត្ថភាព និងកម្រិតលូតលាស់នៃអាជីវកម្មរៀងៗខ្លួន។

ក្រុមហ៊ុន ធីតារ័ត្ន គឺជាសហគ្រាសផលិតផលិតផលសម្អាតគេហដ្ឋានក្នុងស្រុកប្រកបដោយតម្លៃសមរម្យនៅកម្ពុជា ព្រមទាំងបង្កើតឱកាសចំណូលសម្រាប់អ្នកលក់បន្តខ្នាតតូច។ ការងារដែលបានអនុវត្តក្នុងអំឡុងពេលកម្មវិធី រួមមាន ការរៀបចំរចនាសម្ព័ន្ធហិរញ្ញវត្ថុ ការផ្ទៀងផ្ទាត់តម្រូវការទីផ្សារពីអតិថិជន និងអ្នកចែកចាយ ព្រមទាំងការពង្រឹងគំរូអ្នកលក់បន្តប្រកបដោយបរិយាបន្ន។ ចំណែក FHF Capital ជាក្រុមហ៊ុនផ្តល់ដំណោះស្រាយហិរញ្ញប្បទាន ជាពិសេសកម្ចីសម្រាប់ការអប់រំ យុវជន ស្ត្រី និងគ្រួសារនៅតាមជនបទ។ អំឡុងគម្រោងនេះ ការងាររបស់គាត់បានផ្តោតលើភាពធន់នៃហិរញ្ញវត្ថុ ការកំណត់យុទ្ធសាស្ត្រអាជីវកម្ម និងការវាស់វែងផលប៉ះពាល់សង្គម។

គម្រោងទាំងពីរត្រូវបានវាយតម្លៃតាមកម្រិតស្តង់ដាររបស់ប៉ូលសហគ្រិនភាពប្រកបដោយចីរភាព (PED-URDSE) ទៅតាមវឌ្ឍនភាពជាក់ស្តែងនៃអាជីវកម្មរបស់ពួកគេ ដោយចាត់ថ្នាក់ក្រុមហ៊ុន ធីតារ័ត្ន នៅក្នុងកម្រិតទី២ និង FHF Capital ស្ថិតក្នុងកម្រិតទី៣ ។ ទោះបីជាមានទម្រង់ខុសគ្នាក៏ដោយ គម្រោងទាំងពីរបានទាញយកអត្ថប្រយោជន៍យ៉ាងពេញលេញពីកម្មវិធីនេះ។

ក្នុងរយៈពេលប៉ុន្មានខែកន្លងមកនេះ ពួកគេទទួលបានការតម្រង់ទិសពីអ្នកជំនាញប្រឹក្សាចំនួន ៣ រូប៖

• លោក Torsten Kleine Buening (ផ្នែកវិស្វកម្មហិរញ្ញវត្ថុ)
• លោក Tim Grintal (ផ្នែកទាក់ទាញអតិថិជន និងការអភិវឌ្ឍអាជីវកម្ម)
• លោកស្រី Danaé Laot (ផ្នែកសមភាពយេនឌ័រ ការបរិយាបន្នភាពពិការភាព បរិយាបន្នសង្គម ចីរភាព និងផលប៉ះពាល់សង្គម)

«ប័ណ្ណសហគ្រិន» គឺជាការទទួលស្គាល់ជាផ្លូវការពី ស.ភ.ន.វ.ស ដែលបញ្ជាក់ពីជំនាញដែលទទួលបាន ដំណើរវិវត្តន៍ការងារ និងការប្តេជ្ញាដ៏មោះមុត ព្រមទាំងការបើកឱកាសចូលរួមក្នុងបណ្តាញអ្នកជំនាញ និងដៃគូនានារបស់យើង។ កម្មវិធីនេះស្ថិតក្រោមក្របខណ្ឌនៃ «លក្ខខន្តិកៈជាតិនិស្សិតធុរកិច្ច» (SNEE) ដែលដើរតួជាស្ពានផ្សារភ្ជាប់រវាងការសិក្សា និងការបង្កើតអាជីវកម្មជាក់ស្តែង។

តើអ្នកចង់ក្លាយជាសហគ្រិនបន្ទាប់ដែរឬទេ? វគ្គទីពីរនៃកម្មវិធីនឹងប្រព្រឹត្តទៅចាប់ពីខែវិច្ឆិកា ដល់ខែមីនា។ ប្រសិនបើអ្នកជានិស្សិត ឬអតីតនិស្សិតដែលមានគម្រោង ឬគំនិតចង់យកមកសាកល្បង កម្មវិធីនេះពិតជាស័ក្តិសមសម្រាប់អ្នក។ សូមដាក់ពាក្យឱ្យបានមុនថ្ងៃទី៣០ ខែតុលា តាមរយៈតំណភ្ជាប់នេះ៖ https://forms.gle/xjXMhCPuF69FD75A9

សូមចូលរួមអបអរសាទរដល់លោក វុទ្ធី និងលោក ថា ព្រមទាំងថ្លែងអំណរគុណយ៉ាងជ្រាលជ្រៅចំពោះអ្នកជំនាញប្រឹក្សាទាំងឡាយសម្រាប់ពេលវេលា និងការចូលរួមដ៏សកម្ម។