បរិញ្ញាបត្រជាន់ខ្ពស់ នីតិសាស្ត្រ ជំនាញនីតិភូមិបាល និងបេតិកភណ្ឌ (កម្ពុជា និងបារាំង)

អំពីការបណ្តុះបណ្តាល

បង្កើតឡើងក្នុងឆ្នាំ ២០០៦ ថ្នាក់បរិញ្ញាបត្រជាន់ខ្ពស់ខ្មែរ-បារាំង មានគោលបំណងផ្តល់ការបណ្តុះបណ្តាលសម្រាប់អ្នកជំនាញផ្នែកដីធ្លី និងអចលនទ្រព្យ ក្នុងវិស័យសាធារណៈ និងឯកជននៅកម្ពុជា។ ក្រុមសិក្សាធិការត្រូវបានប្រមូលផ្តុំឡើងដោយអ្នកជំនាញកម្ពុជា និងបារាំង អ្នកសិក្សាស្រាវជ្រាវ ឬអ្នកជំនាញផ្នែកអចលនទ្រព្យ (សារការី មេធាវី ស្ថាបត្យករ អ្នកគ្រប់គ្រង) ដែលធ្វើឱ្យការបណ្តុះបណ្តាលបច្ចេកទេសមានកម្រិតខ្ពស់លើផ្នែកដីធ្លី និងអគារ ជាមួយនឹងចក្ខុវិស័យឆ្ពោះទៅរកការអភិវឌ្ឍប្រកបដោយចីរភាព។ សញ្ញាបត្រនេះមានការវិវឌ្ឍស្របតាមតម្រូវការរបស់ប្រទេសកម្ពុជា។ ដូច្នេះ នៅដើមឆ្នាំសិក្សា ២០២០ អ្នកជំនាញនាពេលអនាគតទទួលបានការគាំទ្រលើមុខវិជ្ជាថ្មីចំនួនពីរគឺ៖ លំនៅដ្ឋានតម្លៃសមរម្យ និងការរៀបចំផែនការអចលនទ្រព្យ។

អំពីសាកលវិទ្យាល័យបារាំង

សាកលវិទ្យាល័យ Lyon (Jean Moulin) គឺជាសាកលវិទ្យាល័យផ្នែកមនុស្សសាស្ត្រ និងវិទ្យាសាស្ត្រសង្គម ស្ថិតនៅចំកណ្តាលទីក្រុង Lyon ដែលជាទីក្រុងត្រូវបានចាត់ថ្នាក់ជាបេតិកភណ្ឌពិភពលោកដោយអង្គការយូណេស្កូ (Unesco) និងជាទីក្រុងធំទីពីរនៅក្នុងប្រទេសបារាំង។ ការផ្តល់លទ្ធភាពទទួលបានការអប់រំឧត្តមសិក្សាដោយផ្អែកលើឱកាសស្មើគ្នា គឺជាការយកចិត្តទុកដាក់ជាប្រចាំសម្រាប់ស្ថាប័ននេះ ដែលបញ្ជាក់ពីជំនឿជាក់របស់ខ្លួនថា ភាពចម្រុះ និងលក្ខណៈពិសេសគឺជាទ្រព្យសម្បត្តិ ហើយបុគ្គលម្នាក់ៗត្រូវបានកំណត់អត្តសញ្ញាណតាមរយៈភាពខុសគ្នារបស់ពួកគេផងដែរ។ ជាមួយនឹងនិស្សិតជាង ២៩.០០០ នាក់ រួមទាំងនិស្សិតអន្តរជាតិជិត ៦.០០០ នាក់ មកពី ១២២ សញ្ជាតិ ដែលទទួលបានការស្វាគមន៍ជារៀងរាល់ឆ្នាំ ព្រមទាំងមានភាពជាដៃគូជាច្រើននៅទូទាំងពិភពលោក សាកលវិទ្យាល័យមានលក្ខណៈពិសេសដូចជា៖

– តាមរយៈបំណងប្រាថ្នាក្នុងការធ្វើអន្តរជាតូបនីយកម្ម ដោយលើកកម្ពស់ចលនភាព (ការផ្លាស់ប្តូរ) របស់និស្សិត និងគ្រូបង្រៀន និងតាមរយៈការអភិវឌ្ឍភាពជាដៃគូយូរអង្វែងជាមួយសាកលវិទ្យាល័យបរទេសសម្រាប់គោលបំណងនេះ។
– តាមរយៈការផ្តល់ជូននូវការបណ្តុះបណ្តាល ផ្នែកច្បាប់ វិទ្យាសាស្ត្រនយោបាយ និងទំនាក់ទំនងអន្តរជាតិ គ្រប់គ្រង គណនេយ្យ ទស្សនវិជ្ជា ភាសា អក្សរសាស្ត្រ ប្រវត្តិសាស្ត្រ ភូមិសាស្ត្រនិងការរៀបចំផែនការ ព័ត៌មាននិងសារគមនាគមន៍ ដែលមានថ្នាក់បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិត នៅក្នុងមហាវិទ្យាល័យ និងវិទ្យាស្ថានចំនួនប្រាំមួយ។ កម្មវិធីទាំងនេះត្រូវបានបង្កើតឡើងដោយការប្តេជ្ញាចិត្តយ៉ាងមុតមាំចំពោះមជ្ឈដ្ឋានសេដ្ឋកិច្ច-សង្គម ដើម្បីចូលរួមចំណែកដល់ភាពជោគជ័យរបស់និស្សិត និងសមាហរណកម្មវិជ្ជាជីវៈរបស់ពួកគេ ជាពិសេសតាមរយៈការលើកកម្ពស់ការចុះកម្មសិក្សា កម្មវិធីសិក្សាបណ្តើរធ្វើការបណ្តើរ និងសហគ្រិនភាព។
– តាមរយៈការស្រាវជ្រាវពហុជំនាញ និងប្រកបដោយភាពច្នៃប្រឌិត ជាមួយនឹងអង្គភាពស្រាវជ្រាវចំនួន ១៩ ដែលទទួលស្គាល់ដោយក្រសួងអប់រំឧត្តមសិក្សា និងស្រាវជ្រាវរបស់ប្រទេសបារាំង សាកលវិទ្យាល័យផ្តោតសកម្មភាពរបស់ខ្លួនលើប្រធានបទសំខាន់ៗចំនួន ៨ នៃសង្គមរបស់យើងក្នុងអំឡុងពេលអន្តរកាល៖ បញ្ហាទីក្រុង បរិស្ថាននិងសង្គម សុខភាពសកល សហគ្រិនភាពនិងនវានុវត្តន៍ អន្តរវប្បធម៌និងអន្តរជាតូបនីយកម្ម ការចងចាំនិងបេតិកភណ្ឌ សាសនានិងភាពមិនពាក់ព័ន្ធសាសនា (និយមលោកិយ) និងឌីជីថលនៅក្នុងវិទ្យាសាស្ត្រមនុស្ស និងសង្គម (SHS)។